چشتیاں (نمائندہ مقامی حکومت) ڈپٹی کمشنر ذوالفقار احمد نے کہا ہے کہ شجر کاری نہ صرف انسانی صحت اور ماحول کی بہتری کیلئے ناگزیر ہے بلکہ یہ آنے والی نسل کو خوشگوارفضا اور صاف ستھرا ماحول فراہم کرنے کا ذریعہ بھی ہے۔انہوں نے سنٹرل پارک چشتیاں کے د ورہ کے موقع پر افسران و شہریو ں سے بات چیت کے دوران مزید کہا کہ شجرکاری ماحولیاتی آلودگی کے خاتمہ کے لیے نہایت اہم ہے، لہٰذا ہر شہری کو اس مہم میں بڑھ چڑھ کر حصہ لینا چاہیے۔انہوں نے پارک کا دورہ کیا جہاں صفائی، سکیورٹی اور عوامی سہولیات کا تفصیلی جائزہ لیا اور پارک میں آنے والے شہریوں کے لیے مزید بہتر سہولیات فراہم کرنے کی ہدایت کی۔قبل ازیں ڈپٹی کمشنرنے تحصیل ہیڈکوارٹر ہسپتال چشتیاں کا معائنہ کیا اور وہاں مریضوں کو فراہم کی جانے والی طبی سہولیات، ادویات کی دستیابی اور صفائی کے انتظامات کا جائزہ لیا۔ انہوں نے ہسپتال انتظامیہ کو ہدایت کی کہ مریضوں کو بہترین سہولیات کی فراہمی یقینی بنائی جائے اور کسی قسم کی غفلت برداشت نہیں کی جائے گی۔ ڈپٹی کمشنر نے مختلف سرکاری سکولوں کا بھی دورہ کیا اور تعلیمی معیار، اساتذہ کی حاضری اور طلبہ کو فراہم کی جانے والی سہولیات کا جائزہ لیا۔ انہوں نے اساتذہ کو ہدایت کی کہ وہ تعلیمی معیار کو مزید بہتر بنانے کے لیے اپنی ذمہ داریاں احسن طریقے سے انجام دیں۔ستھرا پنجاب” مہم کے تحت ڈپٹی کمشنر نے دیہی علاقوں (رورل ایریاز) کا بھی دورہ کیا اور صفائی ستھرائی کی صورتحال کا معائنہ کیا۔ انہوں نے متعلقہ عملے کو ہدایت کی کہ صفائی کے نظام کو مزید مؤثر بنایا جائے اور عوام کو صاف ستھرا ماحول فراہم کیا جائے۔ ڈپٹی کمشنر ذوالفقاراحمدنے مختلف شاہراہوں کے کنارے پودے لگا کر شجرکاری مہم کا باقاعدہ افتتاح کیا۔اس موقع پر اسسٹنٹ کمشنر چشتیاں، متعلقہ محکموں کے افسران اور پنجاب پولیس کی ٹیم بھی ان کے ہمراہ موجود تھی