راولپنڈی ریجن میں پبلک ٹرانسپورٹ کے کرایوں میں 12 سے 18 فیصد کمی کا اعلان

راولپنڈی: ریجنل ٹرانسپورٹ اتھارٹی نے پیٹرولیم مصنوعات کی قیمتوں میں نمایاں کمی کے بعد راولپنڈی ریجن میں پبلک اور مال بردار ٹرانسپورٹ کے کرایوں میں 12 سے 18 فیصد تک کمی کا اعلان کر دیا ہے۔ نجی بس آپریٹرز نے بھی بین الاضلاعی روٹس پر کرایوں میں نمایاں کمی کر دی ہے۔

حکام کے مطابق آر ٹی اے سیکریٹری اور ٹرانسپورٹ یونینز کے نمائندوں کے درمیان ہونے والے اجلاس میں فیصلہ کیا گیا کہ ایندھن کی قیمتوں میں تقریباً 20 فیصد کمی کا فائدہ براہِ راست عوام تک پہنچایا جائے۔

نظرثانی شدہ کرایوں کے مطابق ڈیزل سے چلنے والی ائیرکنڈیشنڈ مسافر گاڑیوں کے کرایوں میں 12 فیصد، نان اے سی ڈیزل گاڑیوں اور پیٹرول سے چلنے والی پبلک ٹرانسپورٹ کے کرایوں میں 15 فیصد جبکہ مال بردار ٹرانسپورٹ کے کرایوں میں 18 فیصد کمی کی گئی ہے۔

آر ٹی اے سیکریٹری سید اسد عباس شیرازی نے بتایا کہ نئے کرایوں کا اطلاق فوری طور پر کر دیا گیا ہے۔ انہوں نے ہدایت کی کہ تمام ٹرانسپورٹ اڈوں پر نئی کرایہ نامہ فہرستیں نمایاں طور پر آویزاں کی جائیں، جبکہ زائد کرایہ وصول کرنے والے ٹرانسپورٹرز کے خلاف سخت کارروائی کی جائے گی۔

انہوں نے شہریوں سے اپیل کی کہ اگر کوئی ٹرانسپورٹر مقررہ نرخوں سے زیادہ کرایہ وصول کرے تو وہ 1071 پر شکایت درج کرائیں۔ اس مقصد کے لیے شکایات کے اندراج کا باقاعدہ نظام بھی فعال کر دیا گیا ہے۔

نجی بس آپریٹرز کے مطابق اسلام آباد سے لاہور کے بزنس کلاس کا کرایہ 3,500 روپے سے کم ہو کر 3,080 روپے جبکہ ایگزیکٹو کلاس کا کرایہ 2,370 روپے سے کم ہو کر 2,090 روپے کر دیا گیا ہے۔ اسی طرح اسلام آباد سے ملتان کے بزنس کلاس کا کرایہ 4,200 روپے سے کم ہو کر 4,060 روپے اور ایگزیکٹو کلاس کا کرایہ 2,990 روپے سے کم ہو کر 2,850 روپے مقرر کیا گیا ہے۔

واضح رہے کہ وزیراعظم شہباز شریف نے گزشتہ روز پیٹرول کی قیمت میں 74 روپے فی لیٹر اور ہائی اسپیڈ ڈیزل کی قیمت میں 67 روپے فی لیٹر کمی کا اعلان کیا تھا، جس کے بعد مختلف شعبوں میں عوام کو ریلیف منتقل کرنے کے اقدامات کیے جا رہے ہیں۔