حافظ نعیم الرحمن کا چیئرمین محمد یوسف کو تعلیمی سرگرمیوں کے فروغ کے لئے خصوصی دلچسپی پر خراج تحسین۔
کراچی: امیر جماعت اسلامی پاکستان حافظ نعیم الرحمن نے چیئرمین نیو کراچی ٹاؤن محمد یوسف کے ہمراہ سیکٹر 11-G میں ازسرنو تعمیر اور جدید سہولتوں سے آراستہ شیخ سعدی ماڈل اسکول کا افتتاح کردیا۔ افتتاح کے ساتھ ہی اسکول میں تدریسی سرگرمیوں کا باقاعدہ آغاز بھی ہوگیا۔
اسکول میں جدید فرنیچر، بہتر تعلیمی ماحول اور تربیت یافتہ اساتذہ کے ساتھ طلبہ کو مفت نصابی کتب اور یونیفارم فراہم کرنے کا انتظام کیا گیا ہے۔
افتتاحی تقریب سے خطاب کرتے ہوئے حافظ نعیم الرحمن نے کہا کہ نیو کراچی ٹاؤن میں ترقیاتی منصوبوں پر تیزی سے کام جاری ہے اور محدود وسائل کے باوجود عوامی خدمت کے منصوبوں کی تکمیل قابلِ تحسین ہے۔ انہوں نے کہا کہ شیخ سعدی ماڈل اسکول محض ایک عمارت نہیں بلکہ نئی نسل کے روشن مستقبل کی بنیاد ہے۔ اس منصوبے سے ثابت ہوتا ہے کہ درست نیت اور سنجیدہ کوششوں کے ذریعے سرکاری تعلیمی اداروں کو بھی معیاری بنایا جاسکتا ہے۔
انہوں نے اسکول کی تعمیر و بحالی پر چیئرمین نیو کراچی ٹاؤن محمد یوسف اور ان کی ٹیم کو مبارکباد دیتے ہوئے کہا کہ بچوں کو مفت اور معیاری تعلیم کے ساتھ کتابیں اور یونیفارم فراہم کرنا قابلِ قدر اقدام ہے۔
حافظ نعیم الرحمن نے وفاقی حکومت کی معاشی پالیسیوں پر تنقید کرتے ہوئے کہا کہ پیٹرولیم مصنوعات پر بھاری لیوی عائد کرکے عوام پر مہنگائی کا مزید بوجھ ڈالنا ظلم ہے۔ ان کا کہنا تھا کہ عوام پہلے ہی مہنگائی، بے روزگاری اور بھاری ٹیکسوں کا سامنا کر رہے ہیں، جبکہ حکومت انہیں مناسب ریلیف فراہم کرنے میں ناکام ہے۔
چیئرمین نیو کراچی ٹاؤن محمد یوسف نے تقریب سے خطاب کرتے ہوئے کہا کہ علاقے میں سڑکوں، پارکوں، نکاسی آب، صفائی، اسٹریٹ لائٹس اور تعلیم سمیت مختلف شعبوں میں ترقیاتی کام کیے جارہے ہیں۔ ان کے مطابق تعلیم معاشرتی ترقی کی بنیاد ہے، اسی لیے ٹاؤن انتظامیہ نے اس شعبے کو خصوصی ترجیح دی ہے۔
انہوں نے بتایا کہ شیخ سعدی ماڈل اسکول تین سال قبل خستہ حال عمارت تھی، جہاں تعلیمی سرگرمیاں تقریباً ختم ہوچکی تھیں۔ نیو کراچی ٹاؤن نے عمارت کی ازسرنو تعمیر، تزئین و آرائش، جدید کلاس رومز اور معیاری فرنیچر کی فراہمی کے ذریعے اسے بہتر تعلیمی ادارے میں تبدیل کیا ہے۔
محمد یوسف نے کہا کہ ان کا مقصد بلدیاتی اسکولوں کو اس معیار تک پہنچانا ہے جہاں والدین اپنے بچوں کو داخل کرانے پر فخر محسوس کریں۔ انہوں نے کہا کہ جماعت اسلامی عوامی خدمت کے مینڈیٹ کے تحت تعلیم، ترقی اور فلاحی منصوبوں پر کام جاری رکھے گی۔
تقریب میں وائس چیئرمین نیو کراچی ٹاؤن شعیب بن ظہیر، امیر جماعت اسلامی ضلع شمالی طارق مجتبیٰ، یونین کونسل کے نمائندوں، ٹاؤن کونسلرز، اساتذہ، بلدیاتی افسران اور علاقہ مکینوں نے شرکت کی۔ تقریب کے اختتام پر شرکاء نے اسکول کے مختلف کلاس رومز اور تعلیمی سہولتوں کا دورہ بھی کیا۔