کراچی: میئر کراچی بیرسٹر مرتضیٰ وہاب نے جمعرات کو نارتھ ناظم آباد کے بلاک جے میں ڈوئل کیرج وے کی بہتری اور بحالی کے منصوبے کا افتتاح کردیا۔
اس موقع پر ڈپٹی میئر کراچی سلمان عبداللہ مراد، پاکستان پیپلز پارٹی کے سٹی کونسل میں پارلیمانی لیڈر کرم اللہ وقاصی، سٹی کونسل کے ارکان، منتخب نمائندے اور دیگر افسران موجود تھے۔
تقریب سے خطاب کرتے ہوئے میئر مرتضیٰ وہاب نے کہا کہ بلاک جے نارتھ ناظم آباد میں 3,500 فٹ طویل ڈوئل کیرج وے 128.3 ملین روپے کی لاگت سے تعمیر کیا گیا ہے۔ منصوبے کا مقصد شہریوں کو بہتر اور محفوظ سفری سہولیات فراہم کرنا ہے۔
انہوں نے بتایا کہ منصوبے کے تحت سڑک کی تعمیر و بحالی کا کام مکمل کرلیا گیا ہے جبکہ پوری سڑک کے ساتھ پختہ شولڈر بھی تعمیر کیا گیا ہے۔ منصوبے میں پیدل چلنے والوں اور مقامی رہائشیوں کی سہولت کے لیے 3,500 فٹ طویل فٹ پاتھ کی تعمیر بھی شامل ہے۔
بعد ازاں میڈیا سے گفتگو کرتے ہوئے میئر کراچی نے سیاسی مفادات کے لیے کراچی بند کرنے اور پریس کانفرنسز کی تعداد بڑھانے کی سیاست کو قابل مذمت قرار دیا۔ انہوں نے کہا کہ کراچی کی بندش سے یومیہ اجرت پر کام کرنے والے لاکھوں افراد، تاجروں اور عام شہریوں کو مشکلات کا سامنا ہوتا ہے اور شہر ایک دن بھی بند ہونے سے ملکی معیشت کو لاکھوں روپے کا نقصان ہوتا ہے۔
مرتضیٰ وہاب نے کہا کہ بڑی قربانیوں اور محنت کے بعد کراچی میں امن اور معمولات زندگی بحال ہوئے ہیں، اس لیے شہر کو دوبارہ یرغمال بنانے کی کوئی کوشش قابل قبول نہیں ہوگی۔ انہوں نے سیاسی عناصر پر زور دیا کہ وہ محاذ آرائی اور احتجاج کی سیاست سے دور رہتے ہوئے تعمیر و ترقی کی سیاست پر توجہ دیں۔
میئر کراچی نے کہا کہ اگر متعلقہ علاقوں میں ماضی میں ترقیاتی کام کیے گئے ہوتے تو موجودہ حکومت کو آج یہ منصوبے شروع نہ کرنا پڑتے۔ انہوں نے مزید کہا کہ کراچی کے شہریوں کو بہتر، محفوظ اور معیاری سفری سہولیات کی فراہمی ترجیح ہے اور وسیع تر عوامی مفاد میں سڑکوں اور بنیادی شہری انفراسٹرکچر کی بہتری کے منصوبے جاری رہیں گے۔