کراچی (نمائندہ خصوصی) سندھ ٹورازم ڈیولپمنٹ کارپوریشن نے یومِ پاکستان کے موقع پر خصوصی بچوں اور بزرگ شہریوں کے لیے ایک منفرد ڈبل ڈیکر بس ٹور کا اہتمام کیا۔ یہ ٹور قائداعظم ہاؤس میوزیم (فلیگ اسٹاف ہاؤس) سے شروع ہو کر شارع فیصل کے راستے ملیر ہالٹ تک گیا اور پھر واپس آیا۔
تقریب کا آغاز پرچم کشائی اور قومی ترانے سے ہوا، جس کے بعد پاکستان کے جھنڈے کے رنگوں سے مزین کیک کاٹا گیا۔ اس موقع پر خصوصی بچوں اور بزرگ شہریوں نے خوشی کا اظہار کرتے ہوئے اس تقریب کو یادگار قرار دیا۔
دارالسکون سے تعلق رکھنے والی کوکی لوئیس نے کہا کہ ڈبل ڈیکر بس میں سفر کا یہ ان کا پہلا تجربہ تھا اور وہ یومِ پاکستان اس انداز میں منا کر بہت خوش ہیں۔
معروف ادیبہ اور شاعرہ حمیٰ نعیم بیگ نے کہا کہ اگرچہ دنیا میں مختلف مسائل موجود ہیں، لیکن اپنے ملک پاکستان سے محبت ہمیں یومِ پاکستان کی تقریبات میں شرکت پر آمادہ کرتی ہے۔ ان کا کہنا تھا کہ 23 مارچ ایک اہم دن ہے جسے نظر انداز نہیں کیا جا سکتا، اور نئی نسل کو اس کی اہمیت سے آگاہ کرنا ضروری ہے۔
سینئر صحافی محمود شام نے کہا کہ یومِ پاکستان ہمیں قراردادِ پاکستان کے اصولوں پر عمل کرتے ہوئے ملک کے مسائل حل کرنے کا درس دیتا ہے۔
ایڈونچر ٹورازم سے وابستہ خواجہ جہانزیب نے کہا کہ سندھ پاکستان کا ایک تاریخی صوبہ ہے جس کی سیاحت کو فروغ دینا ضروری ہے۔ انہوں نے خصوصی بچوں کے لیے اس اقدام کو سراہتے ہوئے کہا کہ ایسے بچوں کو تفریح کے مواقع کم ملتے ہیں، اس لیے یہ اقدام قابلِ تحسین ہے۔
ایس ٹی ڈی سی کے منیجنگ ڈائریکٹر فیاض علی شاہ نے کہا کہ اس ٹور کا مقصد یومِ پاکستان کی قومی روح کو اجاگر کرنے کے ساتھ ساتھ خصوصی بچوں اور بزرگ شہریوں کو خوشگوار اور یادگار تجربہ فراہم کرنا تھا۔
گائیڈڈ ٹور کے دوران شرکاء کو شہر کے اہم مقامات جیسے کیماڑی بندرگاہ، اسٹیٹ بینک آف پاکستان، حبیب بینک پلازہ، گورنر ہاؤس اور شارع فیصل کا دورہ بھی کرایا گیا۔
یہ ٹور شرکاء کے لیے کراچی کے متحرک ماحول اور تاریخی ورثے کو قریب سے دیکھنے کا ایک بہترین موقع ثابت ہوا۔