لوئر دیر میں مون سون شجرکاری مہم کا آغاز، ضلع بھر میں 56 ہزار پھلدار اور سدا بہار پودے لگائے جائیں گے

لوئر دیر: ضلع لوئر دیر میں مون سون شجرکاری مہم کا آغاز کر دیا گیا ہے جس کے تحت ضلع بھر میں تقریباً 56 ہزار پھلدار اور سدا بہار پودے لگانے کا منصوبہ بنایا گیا ہے۔

ڈپٹی کمشنر لوئر دیر بشارت احمد نے بلامبٹ میں پودا لگا کر مہم کا افتتاح کیا۔ اس موقع پر ایڈیشنل ڈپٹی کمشنر سید اکرم شاہ، ڈویژنل فارسٹ آفیسر شبیر احمد جان، سب ڈویژنل فارسٹ آفیسر تیمرگرہ اور نیشنل کمیشن فار ہیومن ڈویلپمنٹ (این سی ایچ ڈی) کے ضلعی ڈائریکٹر محمد اسد بھی موجود تھے۔

تقریب سے خطاب کرتے ہوئے ڈپٹی کمشنر بشارت احمد نے کہا کہ موسمیاتی تبدیلی اور عالمی حدت کے اثرات کو کم کرنے کے لیے شجرکاری انتہائی ضروری ہے۔ انہوں نے کہا کہ مون سون کا موسم درخت لگانے کے لیے موزوں ترین وقت ہوتا ہے کیونکہ اس دوران پودوں کی نشوونما کے امکانات زیادہ ہوتے ہیں۔

انہوں نے کہا کہ درخت ماحولیاتی تحفظ میں اہم کردار ادا کرتے ہیں، جو فضائی آلودگی کم کرنے، شدید گرمی کے اثرات کو قابو کرنے اور زمین کے کٹاؤ کو روکنے میں مددگار ثابت ہوتے ہیں۔

ڈویژنل فارسٹ آفیسر شبیر احمد جان نے بتایا کہ شجرکاری مہم کے دوران سرکاری دفاتر، تعلیمی اداروں، پولیس اسٹیشنز، اسپتالوں، پارکوں، کھیل کے میدانوں، گرین بیلٹس، آبی گزرگاہوں اور پہاڑی علاقوں میں پودے لگائے جائیں گے۔

انہوں نے عوام، طلبہ اور زندگی کے تمام شعبوں سے تعلق رکھنے والے افراد پر زور دیا کہ وہ مون سون شجرکاری مہم میں بھرپور حصہ لیں اور لوئر دیر کو سرسبز اور ماحول دوست بنانے میں اپنا کردار ادا کریں۔