ساہیوال میں ٹرانسفارمرز کی چوری اور غیر قانونی مرمت کا الزام میں میپکو کے پانچ اہلکار گرفتار

ساہیوال: وفاقی تحقیقاتی ادارے (ایف آئی اے) نے ٹرانسفارمرز کی غیر قانونی مرمت میں مبینہ طور پر ملوث میپکو کے پانچ لائن سپرنٹنڈنٹس کو لاہور ہائی کورٹ کی جانب سے عبوری ضمانتیں مسترد ہونے کے بعد گرفتار کرلیا۔

ایف آئی اے نے خفیہ اطلاع پر ساہیوال کے علاقے گلبرگ ٹاؤن میں ایک نجی ورکشاپ پر چھاپہ مارا، جہاں مبینہ طور پر خراب ٹرانسفارمرز کی غیر قانونی مرمت کی جارہی تھی۔ یہ ورکشاپ محمد وحید، نوید اقبال اور ان کے دو مکینکس کی ملکیت بتائی گئی ہے۔

ایف آئی اے کے مطابق، میپکو کے متعدد لائن سپرنٹنڈنٹس بھی ورکشاپ مالکان کے ساتھ مبینہ ملی بھگت کے ذریعے اس غیر قانونی سرگرمی میں ملوث تھے۔ ادارے کا دعویٰ ہے کہ ورکشاپ میں ٹرانسفارمرز سے تانبا بھی نکالا جارہا تھا۔

چھاپے کے دوران ایف آئی اے کی ٹیم نے میپکو کے تکنیکی عملے کے ہمراہ ورکشاپ کا معائنہ کیا، جہاں مبینہ طور پر 100، 200 اور 300 کے وی اے کے خراب ٹرانسفارمرز کی غیر قانونی مرمت اور وائنڈنگ کی جارہی تھی۔

بعدازاں اس معاملے میں چھ لائن سپرنٹنڈنٹس کے خلاف مقدمہ درج کیا گیا۔ ایف آئی اے ذرائع کے مطابق، ملزمان نے پہلے گرفتاری سے بچنے کے لیے عبوری ضمانت حاصل کرلی تھی، تاہم فیصل آباد کی خصوصی عدالت نے ان کی درخواستیں مسترد کردیں۔ اس کے بعد ملزمان نے لاہور ہائی کورٹ سے رجوع کیا، جہاں ان کی ضمانت کی درخواستیں بھی خارج ہوگئیں۔

گرفتار ہونے والوں میں محمد طاہر، عمر رشید، حاجی ظفر اقبال، حسن رؤف اور شفقت حسین شامل ہیں، جبکہ ایف آئی اے کے مطابق ایک اور ملزم مہر خرم تاحال گرفتار نہیں ہوسکا اور مفرور ہے۔

ایف آئی اے کے ڈپٹی ڈائریکٹر ہاشم رضا کے مطابق مبینہ نیٹ ورک میں میپکو کے دیگر اہلکاروں کے کردار کا تعین کرنے کے لیے مزید تحقیقات جاری ہیں۔