کراچی: میئر کراچی بیرسٹر مرتضیٰ وہاب نے شہر کی اہم شاہراہوں، سڑکوں، گلیوں، فٹ پاتھوں اور عوامی مقامات سے تجاوزات کے خاتمے کے لیے محکمہ انسداد تجاوزات، کراچی میٹروپولیٹن کارپوریشن (کے ایم سی) کو 15 روز کی مہلت دے دی ہے۔
میئر نے خبردار کیا ہے کہ مقررہ مدت میں نمایاں نتائج حاصل نہ کرنے والے افسران اور اہلکاروں کے خلاف سخت محکمانہ کارروائی کی جائے گی، جس میں ملازمت سے برطرفی اور متعلقہ قواعد کے تحت کارروائی بھی شامل ہے۔
شہریوں کی جانب سے تجاوزات اور عوامی مقامات پر غیر قانونی قبضوں سے متعلق بڑھتی ہوئی شکایات کا نوٹس لیتے ہوئے بیرسٹر مرتضیٰ وہاب نے محکمہ انسداد تجاوزات کے افسران اور عملے کے ساتھ ہنگامی اجلاس کی صدارت کی۔ اس موقع پر انہوں نے محکمے کی کارکردگی پر سخت برہمی کا اظہار کرتے ہوئے کہا کہ زمینی حقائق محکمے سے وابستہ توقعات کے مطابق نہیں ہیں۔
میئر کراچی نے ہدایت کی کہ شہر بھر میں تجاوزات کے خاتمے کے لیے جامع آپریشن شروع کیا جائے، جس میں بالخصوص اہم شاہراہوں، تجارتی مراکز، مصروف سڑکوں، گلیوں اور فٹ پاتھوں کو ترجیح دی جائے۔ انہوں نے متعلقہ افسران کو واضح لائحہ عمل مرتب کرنے، مؤثر کارروائی یقینی بنانے اور 15 روز کے اندر قابلِ پیمائش نتائج پیش کرنے کی ہدایت کی۔
بیرسٹر مرتضیٰ وہاب کا کہنا تھا کہ شہر میں ترقیاتی سرگرمیاں جاری ہیں، تاہم اگر سڑکوں، فٹ پاتھوں اور عوامی مقامات پر تجاوزات برقرار رہیں تو ترقیاتی سرمایہ کاری کے ثمرات شہریوں تک مؤثر انداز میں نہیں پہنچ سکتے۔
انہوں نے محکمہ انسداد تجاوزات کو ہدایت کی کہ عوامی مقامات کو تجاوزات سے پاک کرنے کے لیے فوری اور مؤثر اقدامات کیے جائیں تاکہ شہریوں کو آمدورفت اور پیدل چلنے میں درپیش مشکلات کا خاتمہ ہو سکے۔