کراچی: میئر کراچی بیرسٹر مرتضیٰ وہاب نے کراچی میٹروپولیٹن کارپوریشن کے تحت 14 ارب روپے کے سڑکوں کی بحالی پروگرام کا اعلان کیا ہے، جس کے تحت شہر کے تمام اضلاع میں مجموعی طور پر 139 سڑکوں کی تعمیر و مرمت کی جائے گی۔ اس ترقیاتی پروگرام میں اہم شاہراہوں کی بحالی، نکاسی آب کے نظام کی بہتری، پانی کی فراہمی کی لائنوں کی مرمت اور اسٹریٹ لائٹس کی تنصیب و بحالی بھی شامل ہے، جس کا مقصد کراچی کے بنیادی ڈھانچے اور بلدیاتی سہولیات کو بہتر بنانا ہے۔ یہ اعلان کے ایم سی ہیڈ آفس میں منعقدہ ایک اعلیٰ سطحی اجلاس کے دوران کیا گیا، جہاں میئر کراچی نے کہا کہ شہر برسوں کی نظراندازی کے بعد ترقی کے ایک نئے دور میں داخل ہو رہا ہے۔
انہوں نے کہا کہ کراچی کے شہری بہتر انفراسٹرکچر اور معیاری بلدیاتی خدمات کے حقدار ہیں، اور یہ منصوبے صرف سڑکوں کی تعمیر تک محدود نہیں بلکہ عوام کے اعتماد کی بحالی اور شہر کی بہتری کی جانب ایک اہم قدم ہیں۔ میئر نے کہا کہ حکومت سندھ اس بڑے ترقیاتی منصوبے میں کے ایم سی کو مکمل تعاون فراہم کر رہی ہے، جبکہ تمام متعلقہ محکموں کو شفافیت، اعلیٰ معیار اور مقررہ مدت میں منصوبوں کی تکمیل یقینی بنانے کی ہدایت کی گئی ہے۔ انہوں نے واضح کیا کہ وہ خود منصوبوں کے ٹینڈرنگ، عملدرآمد اور تعمیراتی معیار کی نگرانی کریں گے۔
اجلاس کے دوران ڈائریکٹر جنرل ٹیکنیکل سروسز طارق مغل نے بتایا کہ سڑکوں، نکاسی آب، واٹر سپلائی لائنوں اور برقی انفراسٹرکچر سے متعلق سول ورکس کی ٹینڈرنگ تمام قواعد و ضوابط کے مطابق مکمل ہو چکی ہے، جبکہ ورک آرڈرز جلد جاری کرکے شہر بھر میں مرحلہ وار تعمیراتی کام شروع کر دیے جائیں گے۔