چشتیاں: چشتیاں سے تعلق رکھنے والے سینئر صحافی اور چشتیاں آزاد میڈیا گروپ کے صدر ممتاز انجم ہاشمی کے صاحبزادے حافظ اذان محمود نے محض پانچ ماہ کے مختصر عرصے میں قرآن مجید حفظ کر کے اپنے والدین، اساتذہ اور علاقے کا نام روشن کر دیا۔
تفصیلات کے مطابق 14 سالہ اذان محمود نے لاہور کی معروف دینی درسگاہ مسجد معراج فاطمہ میں مفکرِ اسلام حضرت مولانا محمد احمد شاہ نوری سبطین حسنین شاہ کی سرپرستی اور ماہر اساتذہ کی نگرانی میں حفظِ قرآن کی سعادت حاصل کی۔
حافظ اذان محمود کی دستار بندی کی پُروقار تقریب 26 جون 2026ء (10 محرم الحرام) بروز جمعہ مسجد معراج فاطمہ لاہور میں منعقد ہوئی، جس میں ریونیو پنجاب کے ممبر ملک وحید سمیت علمائے کرام، معزز شخصیات، اہلِ علاقہ اور بڑی تعداد میں شہریوں نے شرکت کی۔ تقریب کے دوران حافظ اذان محمود کو پھولوں کے ہار اور گلدستے پیش کیے گئے اور ان کی اس شاندار کامیابی پر مبارکباد دی گئی۔
تقریب سے خطاب کرتے ہوئے مسجد معراج فاطمہ کے مہتمم مولانا قاری محمد احمد شاہ نوری نے کہا کہ حافظ اذان محمود نے غیر معمولی محنت، لگن اور استقامت کا مظاہرہ کرتے ہوئے انتہائی کم مدت میں حفظِ قرآن مکمل کیا، جو قابلِ تحسین کامیابی ہے۔ انہوں نے بتایا کہ مدرسہ میں حفظ، ناظرہ اور دینی تعلیم کے طلبہ کی تربیت پر خصوصی توجہ دی جاتی ہے اور بہترین تعلیمی و تربیتی ماحول فراہم کیا جاتا ہے۔
اس موقع پر حافظ اذان محمود نے کہا کہ قرآن مجید حفظ کرنے میں ان کے والدین کی دعاؤں، خواہشات اور اساتذہ کی محنت کا بنیادی کردار ہے۔ انہوں نے عزم ظاہر کیا کہ وہ آئندہ بھی دینی تعلیم کے ساتھ ساتھ عصری تعلیم حاصل کریں گے اور اپنی زندگی دینِ اسلام کی خدمت کے لیے وقف کریں گے۔
والد ممتاز انجم ہاشمی نے اپنے جذبات کا اظہار کرتے ہوئے کہا کہ اللہ تعالیٰ کا بے حد شکر گزار ہوں کہ میرے بیٹے نے صرف پانچ ماہ میں قرآن مجید حفظ کرنے کی سعادت حاصل کی۔ انہوں نے کہا کہ یہ ان کے خاندان کے لیے ایک عظیم اعزاز اور باعثِ فخر لمحہ ہے، جس پر وہ اپنے اساتذہ اور تمام خیر خواہوں کے بھی شکر گزار ہیں۔