چشتیاں: گٹروں کے غائب ڈھکنوں سے شہریوں کی جان مال کو لاحق خطرہ، بلدیہ انتظامیہ کی مجرمانہ غفلت

چشتیاں: شہر کے وسط میں متعدد مقامات پر گٹروں کے ڈھکن عرصہ دراز سے غائب ہیں، جس سے راہگیروں اور گاڑیوں کو شدید خطرات لاحق ہیں۔ اہل محلہ نے کئی بار بلدیہ انتظامیہ کو تحریری اور زبانی شکایات دیں، لیکن انتظامیہ ہر بار ان شکایات کو نظر انداز کرتی رہی۔ مقامی شہریوں کا کہنا ہے کہ انتظامیہ کا رویہ کسی بڑے سانحے کی منتظر ہے۔

واضح رہے کہ وزیراعلیٰ پنجاب مریم نواز شریف نے مین ہول کے ڈھکنوں کی حفاظت اور بروقت مرمت کے حوالے سے سخت ہدایات جاری کی تھیں، مگر چشتیاں کی بلدیہ انتظامیہ ان احکامات پر عملدرآمد سے انکاری ہے۔ شہری عوامی حلقوں کا کہنا ہے کہ بلدیہ چشتیاں میں مبینہ طور پر کرپٹ عناصر کی اجارہ داری ہے، اور بوگس بل (جعلی درخواستیں) تیار کیے جا رہے ہیں جس سے خزانے کو شدید نقصان پہنچ رہا ہے۔

شہریوں کا مطالبہ ہے کہ وزیراعلیٰ پنجاب مریم نواز شریف بلدیہ چشتیاں کا خفیہ آڈٹ کرائیں، اور کرپٹ ملازمین کے خلاف سخت ترین کارروائی عمل میں لائی جائے۔ ساتھ ہی گٹروں کے غائب ڈھکنوں کو فوری طور پر بحال کرایا جائے تاکہ کسی ناگہانی حادثے سے بچا جا سکے۔

فیصلہ کن اقدامات نہ ہوئے تو شہری احتجاج کرنے پر مجبور ہوں گے، مقامی شہریوں کا بیان

واضح رہے کہ اس ضمن میں چیف سیکرٹری پنجاب اور کمشنر بہاولپور ڈویژن سے بھی شہریوں نے فوری نوٹس لینے کی اپیل کی ہے۔