اسلام آباد میں بلدیاتی انتخابات سبوتاژ کرنے کی کوشش کی جا رہی ہے: چیف الیکشن کمشنر

اسلام آباد: چیف الیکشن کمشنر سکندر سلطان راجہ نے وفاقی حکومت پر اسلام آباد میں بلدیاتی انتخابات سبوتاژ کرنے کی کوشش کا الزام عائد کرتے ہوئے واضح کیا ہے کہ انتخابات مقررہ شیڈول کے مطابق ہوں گے۔

یہ بیان الیکشن کمیشن کے تین رکنی بینچ کی جانب سے این اے 77 کے ضمنی انتخاب میں ضابطہ اخلاق کی مبینہ خلاف ورزیوں سے متعلق سماعت کے دوران سامنے آیا۔ چیف الیکشن کمشنر نے کہا کہ وفاقی حکومت نے ہدایت جاری کی ہے کہ اساتذہ کو اسلام آباد کے بلدیاتی انتخابات میں ڈیوٹیاں نہ دی جائیں۔

انہوں نے سوال اٹھایا کہ الیکشن کمیشن انتخابی عملے کا انتظام کہاں سے کرے گا؟ ان کا کہنا تھا کہ الیکشن کمیشن وزیراعظم اور حکومت کو ہدایات جاری کرتا ہے، حکومت الیکشن کمیشن کو نہیں۔

چیف الیکشن کمشنر نے حکومتی ہدایت کا سخت نوٹس لیتے ہوئے کہا کہ وفاقی حکومت اسلام آباد میں بلدیاتی انتخابات سبوتاژ کرنا چاہتی ہے، تاہم انتخابات ہر صورت مقررہ وقت پر منعقد ہوں گے۔