اسسٹنٹ کمشنر چشتیاں کا بڑا ایکشن، کرپشن کے الزامات پر پیرا فورس کے تین اہلکار معطل
چشتیاں(جاوید اقبال کمبوہ) اسسٹنٹ کمشنر چشتیاں ساحل رسول چیمہ نے کرپشن کے الزامات پر بڑا ایکشن لیتے ہوئے انچارج پیرا فورس حافظ محمد جمشید اور دو انویسٹی گیشن آفیسرز محمد نعمان اور محمد زبیر کو معطل کر دیا ہے۔
ذرائع کے مطابق مذکورہ اہلکاروں پر دکانداروں پر بھاری جرمانے عائد کرنے کے بعد قومی خزانے میں کم رقم جمع کروانے کے سنگین الزامات سامنے آئے ہیں۔ یہ اہلکار جرمانے وصول کرنے کے بعد بڑی رقم ہتھیا لیتے تھے اور خزانے میں معمولی رقم جمع کرواتے تھے۔
اس کے علاوہ ان اہلکاروں کے خلاف متعدد دیگر شکایات بھی موصول ہوئی تھیں۔ دکانداروں اور شہریوں کی جانب سے مسلسل شکایات کے بعد اسسٹنٹ کمشنر نے ان کے خلاف تحقیقات کا حکم دیا۔ تحقیقات میں الزامات ثابت ہونے پر یہ کارروائی عمل میں لائی گئی۔
اسسٹنٹ کمشنر ساحل رسول چیمہ کا کہنا ہے کہ کرپشن اور ناانصافی کرنے والے کسی بھی اہلکار کو معاف نہیں کیا جائے گا۔ شہریوں نے اس کارروائی کا خیرمقدم کرتے ہوئے مزید شفافیت اور احتساب کا مطالبہ کیا ہے۔