ایل ڈبلیو ایم سی کی لاہور کو صاف ستھرا بنانے کی مہم، 40 سے زائد سڑکوں پر صفائی آپریشن مکمل

لاہور: لاہور ویسٹ مینجمنٹ کمپنی (LWMC) نے بدھ کے روز شہر کی 40 سے زائد اہم سڑکوں پر خصوصی صفائی مہم چلائی تاکہ لاہور کو کوڑا کرکٹ سے پاک اور صاف ستھرا شہر بنایا جا سکے۔

ایل ڈبلیو ایم سی کے ترجمان کے مطابق، خصوصی صفائی مہم کے دوران اسکریپنگ، واشنگ، اسپرنکلنگ اور انسدادِ گردوغبار کے اقدامات کیے گئے۔ صفائی کا دائرہ کار فیروزپور روڈ، حالی روڈ، مین بلیوارڈ گلبرگ، نور جہاں روڈ، مال روڈ، سگیاں روڈ، تاج کمپنی روڈ، شاہدرہ چوک، جی ٹی روڈ، ٹرک اڈہ اور لاری اڈہ سمیت دیگر اہم شاہراہوں تک پھیلا ہوا تھا۔

ترجمان نے بتایا کہ سرکلر روڈ، ایک موڑیہ پل، ریلوے اسٹیشن، شالیمار گارڈنز، بھوگیوال روڈ، داروغہ والا اور سلامت پورہ میں بھی اسکریپنگ اور اسپرنکلنگ کے کام جاری ہیں۔ اسی طرح مومن پورہ بھینی روڈ، دھرم پورہ، ہربنس پورہ اور رحمان پورہ میں بھی سڑکوں کی صفائی اور اسکریپنگ کا عمل مکمل کیا جا رہا ہے۔

صفائی اسکواڈز مولانا شوکت علی روڈ، پی کو روڈ، اللہ ہو چوک، کالج روڈ، بگریاں چوک، کچا جیل روڈ، مادرِ ملت روڈ، ملتان روڈ، ٹھوکر چوک، ایم اے او کالج چوک، چوبرجی اور آزادی چوک پر گردوغبار کے خلاف کارروائیاں کر رہے ہیں۔

ایل ڈبلیو ایم سی کے چیف ایگزیکٹو آفیسر بابر صاحب دین نے بتایا کہ شہر بھر میں گھر گھر سے کچرا اٹھانے کا عمل شروع کر دیا گیا ہے، اور ہر یونین کونسل میں 10 رکشے اس مقصد کے لیے تعینات کیے جائیں گے۔

انہوں نے شہریوں سے اپیل کی کہ فضائی آلودگی کے تدارک اور شہر کی صفائی میں تعاون کریں، کچرا مقررہ ڈبوں میں ڈالیں اور کوڑا کرکٹ سڑکوں یا خالی مقامات پر پھینکنے سے گریز کریں۔