پنجاب میں سیلاب متاثرہ اضلاع میں نقصانات کے سروے کا اعلان

لاہور: وزیراعظم شہباز شریف کی ہدایت پر پنجاب حکومت نے 28 سیلاب زدہ اضلاع میں نقصانات کے تخمینے کے لیے جامع سروے شروع کرنے کا اعلان کیا ہے۔ چیف سیکرٹری پنجاب زاہد اختر زمان کی زیر صدارت سول سیکرٹریٹ میں بدھ کو اجلاس میں یہ فیصلہ کیا گیا۔

اجلاس میں سیلاب متاثرین کی بحالی، امداد کی تقسیم اور صحت و بنیادی ڈھانچے کی بحالی کے اقدامات کا جائزہ لیا گیا۔ چیف سیکرٹری نے ہدایت دی کہ متاثرہ علاقوں میں اضافی خیمے اور خوراک پہنچائی جائے، پانی کی نکاسی میں تیزی لائی جائے اور وبائی امراض کے پھیلاؤ کو روکا جائے۔ انہوں نے کہا کہ تمام ڈپٹی کمشنرز ذاتی طور پر فیلڈ میں موجود رہیں اور سروے کی نگرانی کریں تاکہ شفافیت یقینی بنائی جا سکے۔

ریلیف کمشنر نبیل جاوید نے بریفنگ دیتے ہوئے بتایا کہ حالیہ سیلاب سے 4,500 سے زائد دیہات متاثر ہوئے ہیں اور نقصانات کے تخمینے کے لیے 2,000 ٹیمیں تشکیل دے دی گئی ہیں۔ اب تک 2.6 ملین افراد اور 20 لاکھ سے زائد مویشی محفوظ مقامات پر منتقل کیے جا چکے ہیں، جبکہ 337 ریلیف کیمپ، 429 میڈیکل اور 368 ویٹرنری کیمپ قائم کیے گئے ہیں۔

ستلج اور چناب میں پانی کی صورتحال
ستلج دریا میں پانی کی سطح بلند ہونے سے ملتان، لودھراں اور بہاولپور کے کئی علاقے زیرِ آب آ گئے ہیں۔ چار روز قبل نوراجہ بھٹہ کے مقام پر بند ٹوٹنے سے جلالپور پیروالا کی متعدد یونین کونسلیں ڈوب گئیں۔ شہر کو بچانے کے لیے انتظامیہ نے گیلانی روڈ پر کنٹرولڈ شگاف دیا اور پانی کو دیہات کی طرف موڑ دیا۔

سیلابی ریلے سے ملتان-سکھر موٹر وے (M-5) کے پانچ مقامات پر سڑک ٹوٹ گئی اور قریبی دیہات میں پانی داخل ہو گیا۔ این ایچ اے نے عارضی طور پر ایک ٹریک بحال کر دیا ہے تاہم مکمل مرمت کے بعد ہی ٹریفک بحال ہو سکے گی۔

مظفرگڑھ کی تحصیل علی پور میں پانی اترنے کے بعد مزید 9 لاشیں برآمد ہوئیں جو ڈوبنے سے ہلاک ہوئیں۔ ترجمان پی ڈی ایم اے کے مطابق پنجاب میں اب تک 118 افراد جاں بحق ہو چکے ہیں اور 47 ہزار مواضعات میں 47 لاکھ سے زائد افراد متاثر ہوئے ہیں۔

انہوں نے بتایا کہ منگلا ڈیم 95 فیصد، تربیلا فل کیپیسٹی پر، جبکہ بھارت کے بھاکڑا، پونگ اور تھیئن ڈیمز بھی تقریباً بھر چکے ہیں۔ پنجاب کے بڑے دریا جھیلوں، ستلج، راوی اور چناب میں پانی کی سطح معمول پر آ رہی ہے، تاہم گنڈا سنگھ والا پر درمیانے درجے اور پنجند پر کم درجے کا سیلاب برقرار ہے۔

موٹر وے کی بحالی
این ایچ اے کے مطابق جلالپور پیروالا کے قریب موٹر وے کے متاثرہ حصے کی بحالی کے لیے ٹیمیں دن رات کام کر رہی ہیں۔ حکام نے بتایا کہ مستقل مرمت کے بعد ہی ٹریفک کو مکمل طور پر بحال کیا جائے گا۔

وفاقی سیکرٹری مواصلات علی شیر محسود اور این ایچ اے چیئرمین شہریار سلطان بھی موقع پر موجود رہ کر مرمتی کام کی نگرانی کر رہے ہیں۔