1993میں تعمیر ہونے والی چشتیاں پوسٹ آفس کی عمارت خستہ حالی کا شکار

چشتیاں (نمائندہ خصوصی): شہر میں واقع جنرل پوسٹ آفس کی عمارت شدید خستہ حالی اور بدحالی کا شکار ہو چکی ہے، جس کے باعث شہریوں اور ملازمین میں تشویش پائی جاتی ہے۔ ذرائع کے مطابق 1993 سے قبل تعمیر کی گئی یہ عمارت اپنی طبعی عمر پوری کر چکی ہے، جبکہ گزشتہ کئی دہائیوں کے دوران اس کی مناسب مرمت اور بحالی کا کام بھی نہیں کرایا گیا۔

عمارت کے دروازے ٹوٹ پھوٹ کا شکار ہیں اور زنگ آلود ہو چکے ہیں، جبکہ دیواریں بوسیدہ ہونے کے ساتھ ساتھ مختلف مقامات پر دراڑیں بھی پڑ چکی ہیں۔ بارشوں کے موسم میں چھتوں سے پانی ٹپکنے کی شکایات معمول بن چکی ہیں، جس سے عمارت کی کمزور حالت مزید خراب ہو رہی ہے۔

موقع پر موجود شہریوں کا کہنا ہے کہ پوسٹ آفس کے فرش پر جگہ جگہ گڑھے پڑ چکے ہیں اور عمارت کے مختلف حصے خستہ حالی کی واضح تصویر پیش کرتے ہیں۔ ان کا کہنا ہے کہ موجودہ صورتحال کسی بھی وقت کسی بڑے حادثے یا سانحے کا سبب بن سکتی ہے۔

شہریوں اور سماجی حلقوں نے وفاقی وزارت مواصلات اور محکمہ ڈاک کے اعلیٰ حکام سے مطالبہ کیا ہے کہ پوسٹ آفس کی عمارت کی ازسرنو تعمیر یا ہنگامی بنیادوں پر مرمت کے لیے فوری اقدامات کیے جائیں تاکہ ملازمین اور عوام کو محفوظ ماحول فراہم کیا جا سکے اور کسی ناخوشگوار واقعے سے بچا جا سکے۔

عوامی حلقوں کا کہنا ہے کہ اگر بروقت توجہ نہ دی گئی تو یہ خستہ حال عمارت مستقبل میں ایک بڑے سانحے کا سبب بن سکتی ہے، جس کی تمام تر ذمہ داری متعلقہ اداروں پر عائد ہوگی۔