دانش گرلزاسکول چشتیاں کی طالبہ ہادیہ نور نےپینٹنگ کا عالمی مقابلہ جیت لیا

چشتیاں: دانش گرلزاسکول چشتیاں کی طالبہ ہادیہ نور نے پینٹنگ کے عالمی مقابلہ میں کامیابی حاصل کرکے پاکستان اور اسکول کا نام روشن کردیا۔تفصیلات کے مطابق پورے پاکستان سے موصول ہونے والی 150 سے زائد پینٹنگز کے مابین ایک سخت مقابلہ ہوا، جس میں سے کلاس ہفتم کی طالبہ ہادیہ نور کی شاہکار پینٹنگ کا انتخاب ان 12 بہترین اینٹریز میں کیا گیا جنہوں نے نقد انعامات (کیش پرائز) اور میڈل اپنے نام کیے۔بعد ازاں ہادیہ نور پاکستان بھر کے ان 4 شارٹ لسٹڈ بچوں میں شامل ہو گئی جن کی پینٹنگزجاپان کے شہر ایچی ناگویا (Aichi-Nagoya) میں منعقد ہونے والی "ایشین گیمز 2026” کی بین الاقوامی نمائش (فن رن کمپٹیشن) کے لیے منتخب کی گئی ہیں۔ یہ پینٹنگز "میگا آن لائن ایشیا” کے تحت جاپان میں ڈسپلے کی جائیں گی، جو اسکول کے اعلیٰ معیارِ تعلیم اور اساتذہ کی مخلصانہ تربیت کا منہ بولتا ثبوت ہے۔۔

دانش اسکول گرلز چشتیاں کی ہونہار اور باصلاحیت طالبہ ہادیہ نور نے یہ نمایاں کامیابی اپنی آرٹ ٹیچر مس سعدیہ اصغر کی زیرِ سایہ اور بہترین رہنمائی میں حاصل کی۔بین الاقوامی مقابلہ میں کامیابی کے موقع پر دانش اسکول چشتیاں کی پرنسپل محترمہ راشدہ عزیز اور تمام اساتذہ کی جانب سے طالبہ ہادیہ نور، ان کے والدین اور خاص طور پر ان کی مینٹور مس سعدیہ اصغر کو دل کی گہرائیوں سے مبارکباد پیش کی گئی جن کی انتھک محنت کی بدولت ہادیہ نے یہ عالمی مقام حاصل کیا۔ اسکول انتظامیہ کا کہنا ہے کہ انہیں اپنی اس بیٹی پر ناز ہے اور وہ دعا گو ہیں کہ دانش اسکول چشتیاں اسی طرح دنیا کے ہرہم نصابی مقابلوں میں کامیابی کے جھنڈے گاڑتا رہے۔