لاہور: وزیرِاعظم کے مشیر اور مسلم لیگ (ن) پنجاب کے صدر رانا ثناءاللہ نے کہا ہے کہ بلدیاتی انتخابات کا شیڈول حلقہ بندیوں کے عمل کی تکمیل کے بعد جاری کیے جانے کا امکان ہے۔
جمعرات کو ایک نجی نیوز چینل سے گفتگو کرتے ہوئے رانا ثناءاللہ کا کہنا تھا کہ پنجاب حکومت بلدیاتی انتخابات کے انعقاد کے لیے پُرعزم ہے۔ انہوں نے کہا کہ حلقہ بندیوں کا عمل آئندہ 10 دن میں مکمل ہو جائے گا، جس کے بعد بلدیاتی انتخابات کا شیڈول جاری کیے جانے کا امکان ہے۔
لاہور میں کھلے مین ہول کے واقعے کے حوالے سے، جس میں ایک خاتون اور اس کی بیٹی جاں بحق ہوئیں، رانا ثناءاللہ نے کہا کہ بلدیاتی نمائندے گلی محلوں کے مسائل کو مؤثر انداز میں حل کرنے میں اہم کردار ادا کرتے ہیں۔ ان کے مطابق مضبوط بلدیاتی نظام شہری سطح کے مسائل کے بروقت حل کے لیے ناگزیر ہے۔