چشتیاں: میونسپل کمیٹی پلازہ میں مبینہ غیرقانونی تعمیرات، شہریوں کا احتجاج

چشتیاں کے مصروف علاقے کالج روڈ پر واقع میونسپل کمیٹی (ایم سی) پلازہ میں 35 سال سے قائم لیٹرین اور سیڑھیوں کو منہدم کر کے دکان کی تعمیر کا انکشاف ہوا ہے، جس پر شہریوں اور دکانداروں میں شدید تشویش پائی جا رہی ہے۔تفصیلات کے مطابق ایم سی پلازہ 1990 میں بلدیہ چشتیاں نے سرکاری قرض کے ذریعے تعمیر کیا تھا، جس میں دکانداروں اور عوام کی سہولت کے لیے لیٹرین اور چھت تک رسائی کے لیے سیڑھیاں نقشے کے مطابق بنائی گئی تھیں۔ تاہم حالیہ دنوں میں ان سہولیات کو توڑ کر مبینہ طور پر ایک بااثر شخص کی جانب سے دکان کی تعمیر شروع کر دی گئی ہے۔ذرائع کا کہنا ہے کہ شہریوں نے اس معاملے کی اطلاع ایڈمنسٹریٹر، چیف آفیسر اور متعلقہ رینٹ کلرک کو فون کے ذریعے دی، مگر تاحال کوئی مؤثر کارروائی سامنے نہیں آئی۔ مقامی افراد کا الزام ہے کہ بااثر عناصر کے باعث بلدیہ حکام اس معاملے میں بے بس نظر آتے ہیں، جبکہ بعض افسران کی مبینہ شمولیت کی بھی باتیں کی جا رہی ہیں۔شہریوں اور دکانداروں نے وزیراعلیٰ پنجاب، چیف سیکرٹری پنجاب، کمشنر بہاولپور اور ڈپٹی کمشنر بہاول نگر سے فوری نوٹس لینے کا مطالبہ کیا ہے۔ ان کا کہنا ہے کہ پلازہ کو اس کی اصل حالت میں بحال کیا جائے تاکہ دکاندار اور عوام پہلے کی طرح سہولیات سے مستفید ہو سکیں۔