کراچی (نمائندہ مقامی حکومت) شہر میں جمعرات کو ہونے والی موسلادھار بارش کے دوران مختلف حادثات میں کم از کم پانچ افراد جاں بحق ہوگئے، جبکہ شہری انتظامیہ نے ہنگامی حالت نافذ کر دی۔
پولیس اور ریسکیو حکام کے مطابق چار افراد کرنٹ لگنے سے جاں بحق ہوئے، جبکہ ایک شخص عمارت کا حصہ گرنے سے ملبے تلے دب کر جان سے گیا۔
سائٹ سپر ہائی وے انڈسٹریل ایریا میں 40 سالہ شاہاب الدین بجلی کا مسئلہ ٹھیک کرتے ہوئے کرنٹ لگنے سے جاں بحق ہوگیا، جبکہ پی آئی بی کالونی کے علاقے میں 35 سالہ عبد الولید بجلی کے کھمبے کو چھونے سے جان کی بازی ہار گیا۔
سرجانی ٹاؤن میں سات سالہ بچی دعا بتول گھر کے اندر کرنٹ لگنے سے جاں بحق ہوگئی، جبکہ حسن بروہی گوٹھ میں 23 سالہ سرتاج بھی اسی نوعیت کے حادثے کا شکار ہوا۔
دوسری جانب پاک کالونی کے قریب ایک تین منزلہ عمارت کی دیوار گرنے سے ایک راہگیر ملبے تلے دب گیا، جسے اسپتال منتقل کیا گیا تاہم وہ جانبر نہ ہو سکا۔
بارش کے باعث شہر کے مختلف علاقوں میں سڑکیں زیر آب آگئیں اور ٹریفک کی روانی شدید متاثر ہوئی۔ کے-الیکٹرک کے مطابق حفاظتی اقدامات کے تحت بعض علاقوں میں بجلی عارضی طور پر معطل کی گئی، تاہم بیشتر فیڈرز بحال کر دیے گئے۔
میئر کراچی مرتضیٰ وہاب نے شہریوں سے اپیل کی کہ غیر ضروری طور پر گھروں سے باہر نہ نکلیں اور احتیاطی تدابیر اختیار کریں، جبکہ محکمہ موسمیات نے رات میں مزید بارش کی پیشگوئی کی ہے۔
کمشنر کراچی نے بارش کے پیش نظر رین ایمرجنسی نافذ کرتے ہوئے متعلقہ اداروں کو ہائی الرٹ رہنے کی ہدایت کی ہے۔ شہر بھر میں ہیلپ ڈیسک قائم کر دیے گئے ہیں اور نشیبی علاقوں سے پانی کی نکاسی کے لیے اضافی مشینری بھی تعینات کر دی گئی ہے۔
صوبائی وزیر شرجیل انعام میمن نے کہا کہ تمام متعلقہ اداروں کا عملہ فیلڈ میں موجود ہے اور شہری کسی بھی ہنگامی صورتحال میں فوری طور پر متعلقہ اداروں سے رابطہ کریں۔