کراچی: صوبائی وزیر صحت سندھ ڈاکٹر عذرا فضل پیچوہو کی زیر صدارت اجلاس میں بنیادی مراکز صحت (بی ایچ یوز) پر فیملی پلاننگ سروسز اور فوڈ سپلیمنٹس کی دستیابی کا جائزہ لیا گیا۔
ترجمان محکمہ صحت کے مطابق اجلاس کراچی میں منعقد ہوا، جس میں صوبے کے مختلف اضلاع سے صحت کے افسران نے شرکت کی۔ وزیر صحت نے بعض اضلاع میں سہولیات کی عدم دستیابی پر سخت برہمی کا اظہار کیا۔
ڈاکٹر عذرا پیچوہو نے ہدایت دی کہ 24 گھنٹے لیبر رومز کی مکمل فعالیت کو یقینی بنایا جائے، جہاں سہولیات ناکافی ہیں وہاں فوری بہتری لائی جائے، اور ادویات کی فراہمی ہر حال میں برقرار رکھی جائے۔
انہوں نے کہا کہ تمام اضلاع میں ہنگامی اور ضروری ادویات ہر وقت دستیاب ہونی چاہئیں، جبکہ ہر حاملہ خاتون کو طبی معاونت، ضروری وٹامنز اور غذائی سپلیمنٹس فراہم کیے جائیں تاکہ ماں اور بچے کی صحت بہتر بنائی جا سکے۔
ترجمان کے مطابق وزیر صحت نے پرائیویٹ نیوٹریشن سینٹرز سے متعلق تفصیلی پلان بھی طلب کر لیا ہے، تاکہ صوبے میں غذائیت سے متعلق خدمات کے معیار کو بہتر بنایا جا سکے۔