وزیراعظم عمران خان نے پارٹی کے پارلیمانی ارکان کو ای وی ایم مشین اور انتخابی اصلاحات پر اعتماد میں لے لیا.

اسلام آباد(نمائندہ مقامی حکومت) وزیراعظم عمران خان کی زیر صدارت حکمران جماعت پاکستان تحریک انصاف کی پارلیمانی پارٹی کا اجلاس ہوا، اجلاس کے شرکاء کو الیکٹرانک ووٹنگ مشین (ای وی ایم) اور کریمنل جسٹس سسٹم ریفارمز پر بریفنگ دی گئی۔ذرائع کے مطابق اجلاس میں وزیراعظم عمران خان نےارکان پارلیمان کو حکومتی اقدامات سے متعلق اعتماد میں لیا۔ذرائع کے مطابق اس موقع پر ای وی ایم مشین سمیت انتخابی اصلاحات پر بات کی اور ارکان پارلیمان کو ایوان میں حاضری یقینی بنانے کی ہدایت کی۔وزیراعظم نے کہا کہ ملک میں ہمیشہ فری اینڈ فیئر الیکشن کی ضرورت رہی ہے، شفاف انتخابات کسی بھی جمہوریت کے لیے سب سے اہم ہیں۔انہوں نے کہا کہ ہم نے پوری دنیا کے بہترین اقدامات کا جائزہ لے لیا ہے، لاء ریفارمز کو اب ہر صورت مکمل کریں گے۔عمران خان نے مزید کہا کہ غریب کے ساتھ جرم ہوجائے تو وہ سمجھتا ہے اسے انصاف نہیں ملے گا، ایف آئی آر کے اندراج سے تفتیش تک نئے ریفارمز متعارف کروانا ہوں گے