تمام محکمے الرٹ رہیں اور کسی بھی ہنگامی حالت سے نمٹنے کے لیے اپنی تیاری مکمل رکھیں: ذوالفقار احمد بھون

چشتیاں (نمائندہ مقامی حکومت) ڈپٹی کمشنربہاولنگر ذوالفقار احمد نے کہا ہے کہ پاک بھارت کشیدگی کے پیش نظر تمام محکمے الرٹ رہیں اور کسی بھی ہنگامی حالت سے نمٹنے کے لیے اپنی تیاری مکمل رکھیں۔ عوام کی جان و مال کے تحفظ کے لیے ضلعی انتظامیہ ہر ممکن اقدام کرے گی۔ تمام ادارے آپس میں رابطے میں رہیں اور کسی بھی ناخوشگوار واقعہ کی صورت میں فوری ردعمل کو یقینی بنائیں اور عوام کو مکمل تحفظ فراہم کیا جائے۔انہوں نے ضلعی محکموں ریسکیو 1122، سول ڈیفنس، محکمہ صحت، پولیس، بلدیہ اور دیگر متعلقہ اداروں کے سربراہان کے ایک اہم اجلاس سے خطاب کرتے ہوئے مزید کہا کہ پاک بھارت کشیدگی کے پیش نظر ضلعی انتظامیہ کی جانب سے ہنگامی اقدامات کا سلسلہ جاری ہے، موجودہ حالات میں تمام اداروں کی مربوط حکمت عملی اور چوکنا رہنا وقت کی ضرورت ہے۔ڈپٹی کمشنر نے سول ڈیفنس اور ریسکیو محکموں کو خصوصی طور پر ہائی الرٹ رہنے اور ضروری آلات و وسائل کی دستیابی یقینی بنانے کی ہدایت دی گئی۔ڈپٹی کمشنر نے ڈسٹرکٹ ہسپتال کے دورہ کے موقع پر کہا کہ کسی بھی ممکنہ ایمرجنسی سے نمٹنے کے لیے مکمل تیاری یقینی بنائی جائے اور عوام کو فوری طبی امداد کی فراہمی میں کوئی کمی نہ آنے دی جائے۔انہوں نے مختلف وارڈز، ایمرجنسی، اور طبی سہولیات کا جائزہ لیا اور مریضوں سے براہ راست بات چیت کر کے علاج معالجے کی صورتحال معلوم کی۔ انہوں نے ہسپتال میں موجود گنجائش، ادویات کی دستیابی، اور عملے کی حاضری سمیت دیگر اہم امور کا معائنہ کیا۔ ڈپٹی کمشنرنے بہاولنگر میں قائم کنٹرول روم اور سول ڈیفنس آفس کا ہنگامی دورہ کیا جس کے دوران موجودہ صورتحال میں ضلعی سطح پر کیے گئے حفاظتی اقدامات کا جائزہ لیا۔ سول ڈیفنس کے افسر نے ڈپٹی کمشنر آفس کے عملے کو خصوصی تربیت فراہم کی۔